شسالفة أسماء المناطق والمُدُن ؟!

"بقيق" منطقة في السعودية ، يقال - والعهدة على الراوي- أنّ سبب تسميتها بهذا الاسم هو أنه في بداية تسجيل أسماء المناطق في السعودية كان يمشي الرجل الإنجليزي الموكّل بهذا الأمر مع أحد الرجال البدو في سيارتهم متجولين في المنطقة الشرقية لتسجيل أسماء المناطق ، ومن الدمام إلى الخبر إلى الجبيل إلى رحيمة إلى النعيرية ، وهالانجليزي طايح بالدفتر يكتب ، إلى أن تعب وزهق هالبدوي من الفرارة والدوجة ! وكان ذلك حين وصولهم إلى منطقة "بقيق" ، فسأله الانجليزي : وات إز ذا نيم أوف ذيس إيريا ؟ ، وش إسم هذي المنطقة ؟ ، فالبدوي قال كلمة متداولة عندهم وهي : "أبكيك" ، وهو يقصد جِعْلك تموت وأبكيك . فالانجليزي قام وكاتب بالدفتر عنده ابقيق .

طبعا هذي قصة متداولة لعلها ظريفة ، وأستبعد صحتها ، لكن فعلا يا سادة شسالفة أسماء المناطق والمدن عندنا !؟ لعلّ من جهلي فعلا ألا أعرف معنى مدينة السلام "بغداد" ، أو لا أعرف معنى "دمشق" ، أو "القاهرة" ، أو "بيروت" ، أو "أبو ظبي" ، أو "كيفان" ، أو "الفنطاس" ، أو "مكة" ، أو "الطائف" ، أو "القروان" ..إلخ ، من جهلي لم أعرف معنى هذه الأسماء ، أو سبب تسميتها ، بالتأكيد لهذه المدن أسباب في لتسميتها ، فعلاً نحتاج أن نطلع كثيراً لنعرف ، لعل ياقوت الحموي في معجم البلدان ذكر بعض هذا في كتابه ، لا أدري ، لعلي أخبركم إذا راجعته.

عموما حديثي ليس عن هذه المناطق أو المدن ، لكن أتوافقوني بوجود بعض المناطق إلي فعلا أسماءها ما تترقّع ؟ ولا فعلا تفشّل .. طيب أنا بقولكم اسم منطقة في الكويت ، شرايكم بـ "المهبولة" بالله عليكم هذا اسم منطقة ؟! ههههه ..

- يا الحبيب إنت وين ساكن؟

- والله في المهبولة.

ههههه

صراحة أحس أتفشل لو إني ساكن بهالمنطقة إني أقول إني ساكن فيها بسبب اسمها مع فائق احترامي وتقديري للإخوة القاطنين هذه المنطقة ، عاد والله المهبولة فيها عمارات جديدة الله يستر ما تكون شقتي فيها هههه .

ولا منطقة اسمها "جنوب السِّرّة" !! تكفة جنوب السرة شنو بيكون ههههههه ، وقلّبوها شوي براسهم لقوا إنّ "جنوب السرّة" منطقة كبيرة قالوا خل نقسّمها ، فعطوا وحدة للسنّة سمّوها "ضاحية الصدّيق" ، والثانية للشيعة سمّوها "ضاحية الزهراء" عشان إرضاء الأطراف الباقية.

ولا عندنا منطقة اسمها "أبو فطيرة" هههههه ، وأخوه اسمه "أبو حليفة" !! واختهم اسمها "أم الهيمان" !! ترى جد ما أتغشمر هذي أسماء مناطق ؟

خلصنا من السرّة ، قالوا شلون بس عضو واحد من أعضاء الجسم ؟! ما عجبهم ، قالوا بنسمي منطقة ثانية "الظّهَر" ! لالا مو كافي ، عطونا اسم منطقة ثانية "كبد" ! وفي السعودية سمعوا عنّا فغاروا قالوا حنّا عندنا "حفر الباطن" و "الزلفي".

كأني حرقت مناطقنا وايد صح ؟
نجي على السعودية ، ممكن تفهموني شنو يعني "ظلم" ؟! شلون نقرأها ؟ ظُلْم ، ولا ظَلَم ، ولا شلون .. أحس رحنا فوق ولا تحت اسمها بيكون ذنْب :/ .
طيب شسالفة "الدمّام" ؟ .
زين فيه خوات بعد السعودية شسمهم ؟ إييه "شقرا" و"أشيقر" .. أظن هذا هو اسمهم .. شسالفتهم هههه.
أهل "عنيزة" مقتنعين بهالاسم؟
ولا لا تجي على "الرياض" الله اسم جميل يوحي لك بـ الرياض النضرة ، الرياض الغناء ، ودك تدخل تشم الهوا العليل ، لكنك تدخلها من بين جبلين مقصوصين ، وتدخل الشوارع زححححمة ، وما فيه اعتراف بحارة الأمان ، ومد بوز سيارتك لكي تعبر أولا ، فمن مد بوز سيارته أولا له الأحقية في المرور .
طيب أهل "عرعر" شخباركم؟

ليس القصد الحصر ، إنما مجرد الذكر ، ودّكم تساعدوني نعرف شسالفة أسماء المناطق هذي؟
تتوقعون سوالفها مثل سالفة "بقيق" ، ولا خلصت الأسماء؟
نحن لعلنا تعوّدنا على هذه الأسماء ، فألفناها ، لكن لو يأتي أحد من الخارج وتخبره بها فسينفجر ضاحكاً .

عطونا آراؤكم :).

لكم كل المحبة والود ، حبايب والله :).